黃金博物館 11/7 Part 1

呢一日係旅行入面最期待既一日，因為去九份，上次去既時候已經好中意，好故色故鄉既一個地方！

前一日已經買定台鐵車飛，唔洗到時趕時間！
(其實係因為經過上一次既教訓，上次第一次唔識買搞左好耐又趕時間，又因為即日買既關係冇位坐) 所以今次要醒D！

係台北車站買埋便當，其實我好中意買便當食！

等車中．．．．．．

上車坐定就食便當啦，車程唔洗一個中，所以要爭取時間。
兩個樣都唔錯，不過個味就．．．唔係難食，不過唔好味，點解我地要貪新鮮！
最傳統個個最好味！哂左，下次唔試新野啦！

食便當睇下風景就到啦，好快。

去等巴士，一陣已經有車啦！

今次我地會去金瓜石先，係九份下一個站落車就得啦，不過D人全部係九份落哂車，得返小貓3,4隻。

去金瓜石目的係去黃金博物館！！
呢度以前係個金礦，而家變左博物館，介紹以前點樣掘金，係咩環境工作等等，仲有得比你試下淘金，我等左好耐！

入口

一入到去就見到呢棟野，出面個姐姐叫我地去排隊，話好快有得參觀！OKOK，黎到冇理由唔睇姐！

等一等．．．　(早起個人個樣係支力D)
一入到去就去間房仔睇段片，介紹下間屋，呢度叫四連棟，則係四棟野連埋一齊咁解。
不過呢度唔係原址，佢係參照人地既四連棟一模一樣咁起出黎，而且唔係起左好耐，所以都好新淨！

睇完片之後就可以參觀間屋啦，呢個係防空洞。

廚房

廁所．．但個洗手盤應該係堅野黎！

呢間房，係度播埋D好哀怨既音樂．．

而家睇返D相其實有少少恐怖．．

呢度係太子賓館，唔比入去入面，只可以係外圍兜一個圈。話說當年日本有個太子打算黎呢度，所以特登起左棟野比佢住，點知最後冇黎到，棟野就擺到而家。間房入面係咩都冇，我個人認為可以skip左佢。

沿途都有條咁既路軌，呢架小火車係礦洞入面用黎載人同載金。可以坐入去影相。

我地入去礦洞啦，入場費$50/位，會有小冊子同藍帽子，因為入去要帶頭盔，衛生問題所以要戴藍帽子！

個礦洞叫本山五坑，入口。

入面有假人示範點樣工作。

呢架車就係出面個架，要黎運金。

黠樣睇有冇金呢，就係咁，見到有綠色入面有啡色個附近就有，咁就要炸開佢．．(個度咁寫)

炸完之後就鎚鎚鎚，之後運上車。

礦洞入面既少少範圍就已經係佢地休息既地方。
其實入面四周圍不斷流緊水，地下濕立立，而家有燈比我地睇，但我相信當時可以照明既唔多。
同埋而家有好好係通風系統，但當時冇嫁，只係靠入口個度有空氣入。人為左生活要係呢種情況下工作．．但而家仲有好多地方仲有煤礦．．我諗個環境應該差唔多．．

格離仲有個少少既展覽。唔止一層嫁，你話下面個D人點透氣．．

示範點提煉金。

出去透啖新鮮空氣！

再望望個風景，救命，點樣可以唔愛上呢！
行完呢度興高采烈打算去淘金．．點知要3:30pm先有，而家先2點幾，呢度又已經行哂．．
咁唯有放棄啦，因為要落九份。
點知打算走個陣，係另一邊見到有得玩淘金！　真係超級開心，哇卡卡！
價錢一樣$100，好野，我期待咁樣終於可能玩到！
當你以唯冇既時候突然又出現個種感覺真係加倍興奮！！係十級興奮！
我個人好容易滿足，咁樣我就可以開心一日嫁啦，但如果真係冇得玩，我又會唔開心一日喎！

金呀金，我終於可以得到你！好好玩，不過D相唔係我度，有機會我會放返上黎！
打住咁多先，有D支力，下次打埋PART 2。